فضاء الإبداع

هذا فضاء للجميع فدعونا نحلق معا في أفق الإبداع
 
الرئيسيةالبوابةس .و .جبحـثالتسجيلدخول

شاطر | 
 

 لكمامة لشهرزاد عطية من سلطان العمامة زين العطية

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
عبدو دهمان



عدد الرسائل : 11
العمر : 52
الجنسية : مغربي
تاريخ التسجيل : 23/12/2008

مُساهمةموضوع: لكمامة لشهرزاد عطية من سلطان العمامة زين العطية   الجمعة 26 ديسمبر 2008, 12:23 am

لكمامة لشهرزاد هدية
من سلطان العمامة زين لعطية

شواف او شفت ف منامي شهرزاد صبحت شفاية
عايشت تحت سيوف مول العمامة عبدة سعاية
شفتها ف المعابد ملايكة مصلوبة
جساد مجردة من الارواح
ف شكل للواح،ع الحيط مسنودة
،،،،،،،،،،،،،،،،،،،،،،،،،،
شفت اهل العمامة غضبانة
شعور ذقونها ف السما لواحة
تغوت و تقول هذا منكر ما يقبل سماحة
،،،،،،،،،،،،،،،،،،،،،
بانت لي الدنيا لابسة ثوب عثيم
تبارك سلطان الجور و الضيم
و تنعت شهرزاد بشيطان رجيم
،،،،،،،،،،،،،،،،،،،،،،،
شفت يدين الغدر تتمد لرقابها و الدم ع لجساد سيال
تكول شهرزاد سباب البلا و راس الفتنة و عليه حزب الشيطان عوال
بها عرف شهريار الخطيئة و حياتو صابتها شلا هوال
و بمكايدها تلفت للامة الاحوال
،،،،،،،،،،،،،،،،،،،،،،،،،،،،
فكرت كثير و حيرني السؤال
لما بان لي بوعمامة ف صورة دجال
ساير يطمر ف الحق و يستغفر الرب ف فجر هلال
،،،،،،،،،،،،،،،،،،،،،،،،،،،،،،،،،،
او بدات الدوخة ف التاويل او ناضت
الحيحا وبين الجوامع ناض التهرويل
،،،،،،،،،،،،،،،،،،،،،،،،،،،،،،،،،،
كالوا هذ لحرامي ولداتو شهرزاد ف كوبنهاكن و بكين
ما عندو لا اصل لا ملة لا دين
هذا دمو من دم ماو و ولدات لينين
هذا فيروس براني ريح العولمة
جابتو لينا خزية من الغرب اللعين
،،،،،،،،،،،،،،،،،،،،،،،،،،،،،،،،،،،،
صوت شهرزاد اليوم بركان ثاير
يا غربان رفعوا عليه سيف الظلم الجاير
راه الا هاج يخلي ف السما زغب عتارسكم طاير
،،،،،،،،،،،،،،،،،،،،،،،،،،،
مزين بنات حوا برقصاتهم ف سما الحرية يحوموا
الحوت يعوم ف الما وهما ف ظلها يدوموا
’،،،،،،،،،،،،،،،،،،،،،،،،،
شهرزاد فضلها علينا كثير و لفضلها جيت طالب
ف وقفتها تعجبك خير من الف رجل بشارب
حرية شهرزاد تعلي مراتب وتعلم الفياقة
تصنع من ظهرها مراكب وتحيي الروح العشاقة
،،،،،،،،،،،،،،،،،،،،،،،،،،،،،،،،
حق شهرزاد ف القران حق معلوم و ف السنة شرحو كافي
الى عند شهريار قلب رحيم لازم يعترف ليها بحق وافي
يا للي تعارض حق بنت حوا لا تتعصب و كون فاهم
راه ما ينفع مع لحباب غ المحاورة او قيل عليك العنف غذا تصبح عليه نادم
،،،،،،،،،،،،،،،،،،،،،،،،،،،،،،،،،،
شهرزاد ارض عاشت سنين البور
و اليوم صبحت تتكلم و بغات تثور
يا ارض خصبة و غنية
بالحب و الرحمة و الانسانية
يا نهر بضفاف ترسى فيه مراكب
و لها يعود كل طير ف العشية مرفرف الجناح
يتغنى بالحق و بالحب صوتو فواح
يمسح دموع الصبي و الصبية
و يخفف الاثعاب ف البيت الزوجية
ف عيونو الصغير و الكبير
وف الدار وناسة و محنة ومنبع الخير
،،،،،،،،،،،،،،،،،،،،،،،،،،،،
يا ام صابرة ,,,,,,,,يا اخت صابرة,,,,,,,,يا زوجة صابرة
يا بنت صابرة,,,,او ,,,,مازال صابرة
زمن القهر راسو شاب
إذا يا صابرة يتمحى العذاب
الظلم و الجور زمانو راح
وانت حريتك شمس ضوها لاح
او عمر ضو الشمس ما يصدو غربال السفاح
،،،،،،،،،،،،،،،،،،،،،،،،،
هامون عبدوس / الخميسات: 06/04/2006
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
عبدو دهمان



عدد الرسائل : 11
العمر : 52
الجنسية : مغربي
تاريخ التسجيل : 23/12/2008

مُساهمةموضوع: صياد نعام مول الكلام   الجمعة 26 ديسمبر 2008, 12:30 am

صياد نعام مول الكلام

جيتك من قلب الف ليلة و ليلة
على بساط الريح نطوي لغمام
جيتك قطرة من سحابة ولادة
حاملة شتاها على ظهور ليام
°°°°°°°°°°°°°°
جيتك من بطن حوت العهد البالي
جيتك من السند و الهند
بلسان السندباد الراوي
حامل الف حكاية و حكاية
وكل حكاية تولد مواج
وحدة تنسيني هم سعدي للي عواج
وحدة تزيد غمي و بكاي
و الحكاية تنطق المرايا
جيتك بحار نقذف ف مواج البحور
ناوي نخلي يام زمان تبور
ونبدا صفحة جديدة كلها نور
°°°°°°°°°°°°°°°°°°
طليت على مراية زماني
بان لي على راسو جرح دامي
مكبد مداد تفوارو باقي حامي
خوفنا العباد و بالدم المكبد
و بالمداد المفور كتبنا كيف
رشق لينا تاريخ البلاد
وهكذا دازت يامهم سواد ف سواد
وبقات رحلة السندباد ريح
تعصف ف شعاب الواد
وتهز الخيام وتلف الوتاد
°°°°°°°°°°°°°°°°°°°°
جيتك من جوف الوقت الحامي
جيتك شهرزاد قصيدة
و شهريار لسان نسوانو
يدخل كل ليلة بهمة
ويصبح طايح لو سروالو
وحيلة شهرزاد تمنعو
ما ينفذ للي ف بالو
يكره نفسو و ينوي يهجر وكارو
و بسكوت شهرزاد ينعس
الفروج ف حجر شهريار بلا ما يقاقي
و تصبح شهرزاد قدام المرايا كتماكي
وبعد شهر ناقص........وقرن و ميلاد
جديد ؟........جانا بلا ميعاد
من ثقوب الغربال طلعت شهرزاد
مداح يصول و يجول ف البلاد
تفتح كتاب المعاني
وتجعل تاريخ الكلام اماني
وتجينا قلام ف صفة بشار
فصيح من بن هاني
°°°°°°°°°°°°°°°°°°°
كالت:.............. ما بقى قلام
ما بقى مــــــــــــــــــداد
بعد ما صبح الطالب عود ملجم
ما بقات فيه نفخة
................ما بقى جافل حران
°°°°°°°°°°°°°°°°°°°°°°°
او جاتنا شهرزاد خرى
ف تاريخ الفضايح تقرا
جاتنا ضبرة نابتة على ظهر هذ الجيل
توزع بنيابها مصارن لوجورنال
و نيشان و تيل كيل
تدق اليوم على مول لقلام بالمكر
تشربو كاس التبهديل
وتكلسو على شوك الصبار
تغزل خيوط الكلام على سيف بتار
وتزرعو ف قلب تاريخنا
جمرة يشخد بها لهيب العار
°°°°°°°°°°°°°°°°°°°°°
فكر شهريار ف شي تخريجة
تكــــــــــــــــون لو نتيجة
فكر ف شي صيدة بلا نبلة
يكون فيها عنتر المعاني
تجيه القوافي عبلة
و يكون بن شداد زماني
°°°°°°°°°°°°°°°°°
حط القلم و الدواية
لقى الصمق داب
وفتح دفوف الكتاب
لقى حروفو منقطة كحل من الغراب
سطور مخبلة ف كبة من سراب
°°°°°°°°°°°°°°°°
و نزل من السما السابعة صوت خفاق
نفخ نفخة هزت البواق
وبرح البراح ف كل السواق
طاح الميزان وطاروا الصروف
و على صوت البراح دزو الخروف
حاكموا الورقة و القلام وتيتموا الحروف
بانت لي الميم...........معلقة ف شوك السدرة
والسين............روح ف جوف البدرة
و الليف علام واقف.........سيف جارح ف سوق الهضرة
والهمزة ثمرة............يمكن جمرة ف حلق النفاخ
رنة صادقة .............تحيي لدواق
وصبحت قضية المساء.........غمزة للفاهم
نغزة شوكة ف حلق اللجام
صياد نعام مول الكلام
للي تابعو......
ديما ديما........لابسو.......
مضايقو.........
ملاحقو.........
سنين عالدوام. الخميسات 07/11/2008
دهمان عبدوس
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 
لكمامة لشهرزاد عطية من سلطان العمامة زين العطية
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
فضاء الإبداع :: شعر العامية-
انتقل الى: