فضاء الإبداع

هذا فضاء للجميع فدعونا نحلق معا في أفق الإبداع
 
الرئيسيةالبوابةس .و .جبحـثالتسجيلدخول

شاطر | 
 

 نحت الحنين

استعرض الموضوع السابق استعرض الموضوع التالي اذهب الى الأسفل 
كاتب الموضوعرسالة
سميح عزت



عدد الرسائل : 1
العمر : 48
الجنسية : مصرى
تاريخ التسجيل : 13/01/2009

مُساهمةموضوع: نحت الحنين   الخميس 16 يوليو 2009, 12:39 am


نحت الحنين

للقلب بوابه من عتمة سنين قضبان
حاجز مابينى وبينَك الألم الجسور
إنتَ اللى فارش آهات جرحك ف جوايا
وانتَ اللى شارد من قطيع الموت وبتحاول
تجتر من حلمك حياةْ الشقشقات والنور
يشب جواك الشعور بالعدم لبلاب وشابا ..
يسقط هلامك فوق كفوف الغربه تتحايل
على لسع بصمةْ خربشتها فيك بآهه ..
والتفاته بجنب عين ..
لعمرك المجرور على سطور الرحيل
تشدك الذكرى للوزةْ قطن ف عيونك زمان
صاحيه من نومها تغازل ..
رعشة النسمه على خصر العيدان
تفوق بدقةْ سنديان الوقت ف عروق الدماغ
فتستبين ..
فشل الحوار بينك وبين الأمسيات ..
إجبار قوافى ضحكتك .. على السكون
تعاريج مراية غربتك تعكس لك الحلم الكسير
تهاويم بخار ..
تحاول تنقش اللحظه فى دفتر حضور ..
كل القصايد تنتنى جواه تقف مخالفه للنظام
يتزلزل الدفتر تصيبه حالةْ إنفصام ..
يطوَّح كوعك الراكن على طاولة ألم أعوام
كل أسباب القصيدة تعلن حاله طارئه .. إمتناع
تنزف الأوتاد كما ضافر .. لسه مخلوع من صباع
ترسم قوسين بينهم فراغ ..
تفوق على صرخةْ حنينك اللى لسه بيستعين
بالأمانى لفهم ألغاز الحياه ..
تحتمى فى حضن أمك رغم بعده م الأنين
......
...........
تلسعك ندهة حنينها فى السكون
ارجع ياواد ..
هو انت ماكلِّش رحيلك من خطاك .. ؟
هو انت ماكلِّتش من عفق الحنين ؟
ولا لسه ما حنتش للحضن الحنان ؟
إختشى ..
طارت حمامة الانتظار من عش قلبى ياولد
والصبر فك القيد وحرجم لجل مايفك اللجام
لوكنت رضعتك بغير صدرى ياولدى كان يكون ..
إنك تسيب البحر هايج فى الضلوع العطشانين
بس انت راضع من نهودي الطيبين ..
شهدين وماء زمزم كمان ..
يبقى ليه تقسى على حلمةْ بياض شَعرى وتتجاهل كده ..
نحت الحنين
حوالين عيونى وكل صفحه ع الجبين
تكتب لها بين القوسين ..
معلهش ياامه ما انتى عارفه أصل فص الملح أيه
هو فيه منفي بيلبس وش غير وش الحنين ؟
كل بذرة بتترشق فى الأرض تشبه أصلها
شُفتى مره بذرة المشمش بتنبت سيسبان ؟
بس ملح الأرض قاسى ع الجدور ... !!
فاكره لما ..
كنا فى موسم بلدنا نكتف المشمش بياما من الحبال
لجل مانجبر شواشى الطرح غصب عنها تستقيم
هو ده وعد الشنيق الحى بين ..
زاوية حصار الغربتين ..
.......
.........
تبعت سلام ..
لذكريات سابها صباك على جدر نخله فى الغيطان
ونطتين على حجر ابوك وقت الصِغَر ..
وضحكه منه رغم لحده لسه طايره ف المكان
ولزقزقة جمع الصحاب .. طيبةْ الجيران
ويختفى إنسان عِنيك تحت الدموع حين تفتكر ..
وقت الوداع وفرفرة طير الأمان
جوا الوريد الملتوى بفعل الهوان .............
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
فريـــدة

avatar

عدد الرسائل : 20
العمر : 39
الجنسية : مصرية
تاريخ التسجيل : 27/09/2009

مُساهمةموضوع: رد: نحت الحنين   الأحد 27 سبتمبر 2009, 6:27 pm

جميلة اوي الحاجات العامية هنا
فعلا مستوى العامية هنا حلو جدا او يمكن عشان بفهمها اكتر من الحاجات التانية
تسليم الايد اللي كتبت و المشاعر اللي فكرت
محبتي
الرجوع الى أعلى الصفحة اذهب الى الأسفل
معاينة صفحة البيانات الشخصي للعضو
 
نحت الحنين
استعرض الموضوع السابق استعرض الموضوع التالي الرجوع الى أعلى الصفحة 
صفحة 1 من اصل 1

صلاحيات هذا المنتدى:لاتستطيع الرد على المواضيع في هذا المنتدى
فضاء الإبداع :: شعر العامية-
انتقل الى: