أبيض ولا أسود

حقيقي مش قادره أحدد
انت ابيض و لا أسود
صدق ده اللي بين عينيك
ولا مكر
جوه عقلك ميه عصابه و الف وكر
خللي بالك .. ان قلبي لسه بكر

ايوه شايفاه .. مد أيده
بس خايفه
لما اروحله
ابقي واحده من عبيده
و ارجع اسأل
جرح قلبي بأيه يفيده
خايفه أظلم
خايفه أألم
و خايفه من تاني أعيده

يبقي ابعد من جديد
و اقفل الباب الحديد

كنت فاكره ان بمرور السنين
حأقدر ابني جدار لقلبي و يستكين
و أبقي صلبه
و بمناعتي ..أهزم الشوق اللعين

بس جالي ... اللي مش قادره أحدد .. هو مين
جوه قلبه صحيح حنين ؟؟
و اللي سامعاه بين حروفه
صوت بيصرخ .. صدقيني .. عمري يوم ما حأستهين

ولا انا عنده يا دوبك صيد ثمين
او وسام عايز يضيفه جوه لوح النياشين

مش في ايدي غير دعاء
و عيني مليانه برجاء
ما استاهلش انك تضيعني بغباء
و أي نصر ده اللي ييجي من اغتيال الأبرياء

في النهايه .. احب أوصل لك رساله
لو نصيبي معاك حيبقي اني اتجرح
يبقي ابعد .. و مش ضروري تكتسب نوط النداله

جميلة جدا جدا
بصراحة قصيدة رغم حزنها لكنها مؤثرة جدا جدا
شكرا يا هلولة