إيّاك تكون فاكر إنّ هواك دا قادر
يمْحِى كل الجراح
جَرْح الكرامة غَايِر
جوَّة القلوب وسَايِر
لا
ولا مليون صَبَاح
إيّاك تكون فاكر إن القلوب مَعَابِر
مفتوحة البِبَان
وقت مابتحب تدخل
وقت ما تكره بتخرج
ووراك يفضى المكان
إيّاك تكون فاكر إن الطير اللى هاجر
من تانى يعود أوام
مش هايبطل يسافر
ويبعد عن دواير
الخوف من الأيام
إيّاك تكون فاكر إن الشموس تغادر
وتسيب لينا الضباب
ما خلاص شُفْنا بعنينا
غَدْرَك وذلَّك فـــينا
لا شكوى ولا عتاب
إيّاك تكون فاكر إن النسيان دا ساهل
لا نار ولا مرار
لكن مش باقى لينا
غير الجَمْر فـ إدينا
ومالناش فيه خيار
موضوع: القلوب مش معابر : شعر 
الثلاثاء 26 مايو 2009, 12:03 am