دم
( 1 )
برزوا النهدين
قلعين فايرين
اتلف العود
واتكسى بطوفان حنيه وشوق
الشعر سدايب
وحبال بتنادى
اللى هيتعلق فيهم
يتمرجح بالشوق
ويموت
عماله تكبّرى
وتبخرى فى السنيوره
بتغزلى توب للفرح النايم فى جفونك
- المهر
- لابد كبير
والعش حرير
ولابد كمان خيّال
قوّال
يطلع درجات السلم زَحَفْ
- والدهبات
- مليون قنطار
بترصع طرحة توب البنت
بميت مليون إنذار
نامى فى حفظ الله يا بنيه
نامى
نامت
عدى وخرط الخراط
واستحسن
أحسن خرطه ولوّن
الرمش
مطاطى على جفنيها
والخد
مخده حرير
والصدر
مدلى النور
والخصر
كمان بنور
نامى ف حفظ الله يا بنيه
رقيتك
شر العين
بركة حسن وحسين
يجعل شطوطك ضى
يجعل نهارك حى
الأوله بسم الله
والتانيه بسم الله ..
والتالته ..
( 2 )
اتفرد الصباع ع الآخر
مزع نسيج وشها
الدم شرنق ع الملايه
لا اتوجعت
ولا أنّت
اتمطط جسدها
بشوق
عاود
وسع مكان تانى
عليت آهات البنت
قفل المكان
ع السر
دابت فلانه فيه
* * *
هدّى الزينات يا ام البنيه
قولى لابوها
إن كان جعان
فارق لسانه الزاد
وشها لم يتاخد
غصب
عود كبريت
اتولع
فيها
موضوع: قصيدة بالعامية المصرية بعنوان (دم) 
الجمعة 30 مايو 2008, 5:33 pm
