قول يا شاعر للاستاذ محمد الشرنوبى شاهين ( القليوبية )

شعر للاستاذ محمد الشرنوبى شاهين ( القليوبية)
---------------------------------------------------------------------------------------------------------
---------------------------------------------------------------------------------------------------------

00قول يا شاعر 00
قول ما عندك قول وعيد
وان تقول ماتخافشى شى
إنت نازف دم قلبك
هم فى مجور القصيد
واللى همة مص دمة
إن يعيش ماتقولش حى
حين ما ترفض
او تفضفض
شيل كفن دنياك يا شاعر
واشترى بالعمر شعرك
حين يكون الشعر جمرة
نارها خضرة ، نارها حمرة
طالعة من جواك بتنسج
غزل فكرك
إن يكون فى توب قديم
او جديد
00 قول يا شاعر 00
قول ما عندك قول وعيد
لما كل الناس تقولك
هل يا شاعر من مزيد
00 قول يا شاعر 00
عن سجية عن هوية
هات ما عندك م السواقى الجوانية
مد إيدك
هات حروف الكلمة من جواك عفية
من حكاوى ليل بطولة
من غناوى صبر ما تعدش حمولة
من سنين باتت على صدرك تغنى
بالامانى والتمنى
وانت كف ابيض بمية نار محنى
م اللى قال الجهل عنة
كان على جبينك مسطر
00 قول يا شاعر 00
إن تكون الكلمة عبلة
يبقى رب الشعر عنتر
وان تكون المعنى فى جوفك سجينة
تبقى منى ، تبقى عنى
تبقى عن إية القضية
اللى بكرة ، وبعد بكرة
راكبة ريح الخوف وجية
واللى يوم عن يوم بتولد
والولادة هية هية
00 قول يا شاعر 00
إن تكون شاعر ، ووجدانك ربابة
فيها روح الفن ، مش فن الكتابة
شد أوتارك وغنى
فين ما توصل طلتك بين الجفون
تلقى معنى الشعر محفور فى العيون
تلقى عمر الدنيا كلة
شمس تاهت
عن خطاويك عن نهارك
بدر عايش حلم ليلك
داب فى أناتك ودمعك وانتظارك
وانت عاشق
إن تكون فى العشق صادق
قلبى راح يعرف طريقك
واما حسك
حاعرفك من همس حسك
بين طوابير الغلابة
وان تعفر عينى بشوية ترابة
عمرى بالعمر إن عرفتك
أو قريتك
أو سمعتك
حتى لو اسمك يا شاعر
فوق سحابة
----------------------------------------------------------------- -
شعر للاستاذ محمد الشرنوبى شاهين ( القليوبية )

اخى الكريم الاستاذالجميل مثل كلماتة الشاعر محمد حسنى ابراهيم
وافر شكرى وخالص مودتى لشخصك الودود
---------------------------------------------------------
اخوك حكيم