وبقيت منذور للحزن

من يونية 79
وانت بترفض ..
تتعامل مع الطرح الموت حواليك
على إنه حقيقة
من يوم ماأخدها التاكسى لمستشفى المواساه
واتنطرت من عينها اللهفة بتحضن خوفك
مع رعشة آخر حرف ف كلمة راجعالك
وانت مكدب كل اللى بحصل قدامك
العمال اللى بتنصب قدام بيتكم
ف صوان اليتم المترصع بالشفقة
حشد قرايبك
اللى اتملت الشقة بهمس نحيبهم فاجأة
واللى انت بقالك
أكتر من ست سنين
ما سمعتش عنهم حاجة
صوت الطبلاوى الطالع ...
من تسجيلكوالإيوا المركون
على رف قديم ف الصالة
أثر الصادمة البادية على وشوش اخواتك
وسط حريم العيلة
حتى الخطين الغامقين
اللى اتحفروا ف وش أبوك
مع ريحة الوجع الفايح ...
من عينه تجاهك
مع مسح إيديه على شعرك
كل التفاصيل بتقول ..
إن انت بقيت منذور للحزن
كان نفسك حد يقولك
زى مابتشوف ف الافلام العربى
( سافرت لبعيد ..
وحتتأخر كام شهر هناك )
كان نفسك حد يصد كهولة عيل حواك
مستنى نتيجة الابتدائية بعد يومين
كل اللى عينيك شايفاه ....
تكرار لسيناريو
صحيت من نومك مفزوع
مش عايز تفتكره
مع إن( الموت ف الحلم حياه )
قالت كده قدامك وانت مصدقها
أصلها لوماتت فعلا ..
إيه ح يخليها تقولك ( راجعالك )
إيه ح يخليها تسيبك ....
تستنى حاجات
أخدتها وح تموت وياها
سبت الدنيا وراك بتعيط ..
وبتنعى غيابها
ودخلت أوضتها ..
تحضن ف حضورها الطاغى على الموت
مع حيرة أسئلتك
الى استعصى عليك تلاقى لها إجابة
إلا ف وقت ماغمرك إحساس
بيفك طلاسم حيرتك
دايماً قبل ماكنت بتوصلّه
تتهدم كل جسور الحكايات
اللى انت بقيت
محسود علشانها من صحابك
مع كل بنات الشارع
دايماً كات تفشل تاخدك
وتقرب بيك لجلاله
كل النزوات المرمية ف هامش حواديتك
بس انت ضحكت عليه ف الآخر
وفضلت مكدب
ألاعيبه اللى بعتها ذهول ....
ف وشوش اخواتك وقرايبك
وف قطمة ضهر أبوك قدام الدنيا
من حقك تفرح
بعد ماقدرت ( همسة )
من خلف قزاز حضَّانة ....
ف مستشفى الشاطبى
ترجعلك بنتيجة الابتدائية...
اللى انت قعدت بتستناها
من يونيه 79
ولغاية يوليه 2003