شوية كلام
مصر فيها شباب زي الورد
محمود و حسين وأبوشفه وسعد
وف قهوه ف غرزة يلمو ف بعض
ويعيشو سوى بالطول والعرض
وف جيبهم كيفهم زي الرز
ويقول أبو شفه يلا نرص
حجرين حلوين والمزة تمز
والدنيادى ايه طز ف طز
الله الله على أحلى شعب
دايما يختارو الحل الصعب
ويجيبو لروحهم وجع القلب
ولو غلطو يقولو مالنا ذنب
أنا عندى كلام عندكو وقت
عايز احكى وافضفض اتخنقت
والله لعيشة نضيفة اشتقت
لكن خلينى اكمل دلوقت
الناس معذورة برضه يا بص
بتدور ف مكانك زي البرص
و بترمى سمومك ولا بتحس
مش راجل ولا حصلت النص
هرقص و هغنى ول يا ول
أسعار الحاجة ف ايد الكل
ولا فيه فقرا شايفين الذل
والعيشة ف مصر جميلة وفل
مفيش ف الدنيا زينا حد
مرتاح وماعندوش جذب وشد
واللحمة دى عنده سبت وحد
واتنين والعداد عادى يعد
ماتيجو نرجع لشباب مصر
ونومهم صبح وضهر وعصر
وسهرهم سوى م العشا للفجر
على دومنا ولا رمية زهر
ولسه ماجبتش سيرة الست
خايف م الخلع بكيف الست
يامصايبك لينا ياعصر النت
م اللي بيجرى عقلى هيشت
موضوع: شوية كلام 
الأربعاء 20 أغسطس 2008, 11:36 pm